مقالات
“قبل المأذون”… حين يصبح الوعي أهم من الفرح لماذا كتبت هذا الكتاب؟
بقلم د : آمال إبراهيم
استشاري العلاقات الأسرية ورئيس مجلس الأسرة العربية للتنمية
بدأت الفكرة من مبادرتي المجتمعية “رخصة القيادة الأسرية”، واللي كان هدفها تأهيل المقبلين على الزواج من خلال تدريب عملي على مفاهيم جوهرية:
كيف تختار؟
كيف تفهم؟
كيف تدير الخلاف؟
وكيف تبدأ علاقة مبنية على الوعي لا على الأمل فقط؟
على مدار 3 سنوات، كنت بجمع كل الأسئلة اللي شفتها في العيادة، والردود اللي كان نفسي الناس تعرفها قبل ما “يكتبوا الكتاب”.
والنهاردة، الكتاب أصبح بين إيديك.
محتوى الكتاب في سطور
الكتاب مكوّن من 6 فصول أساسية + تدريبات واختبارات تطبيقية، وهو رحلة من الداخل إلى الخارج… من فهم الذات إلى اختيار الشريك.
الفصل الأول: إزاي اتغيرت معايير اختيار شريك الحياة؟
زمننا اتغير…
والسوشيال ميديا غيّرت شكل الحب والارتباط.
هل بنختار بصدق؟ ولا بنهرب من الوحدة؟
الفصل ده بيجاوب على ده بلغة قريبة من القلب.
الفصل الثاني: فهم طبيعة الخلافات الأسرية
الخلافات مش نهاية العلاقة… أحيانًا هي بدايتها الحقيقية.هنا بنتكلم عن “ليه بنختلف؟” و”إزاي نعرف نتصالح من غير كسر؟”
الفصل الثالث: أنواع الخلافات
مش كل خلاف سببه شخص، أحيانًا الخلفيات النفسية، القيم، أو التربية هي السبب. هنشوف مع بعض أشهر أنواع الصدام داخل البيوت.
الفصل الرابع: فهم الذات – أول خطوة للحب الحقيقيلو معرفتش نفسك… مش هتعرف تحب.
الفصل ده بيقربك من ذاتك، جروحك، واحتياجاتك، قبل ما تمد إيدك لحد تاني.
الفصل الخامس: الشرارة اللي ولعت النار
في لحظة صغيرة… ممكن كل شيء يتغير.
هنا بنفهم إيه اللي بيشعل الخلاف فجأة، ونعرف نطفيه قبل ما يكبر.
الفصل السادس: متى نرفع الأعلام السوداء؟
العلامات الحمراء في العلاقة مش دايمًا واضحة، بس وجودها بيحذر من الغرق.في الفصل ده خريطة واضحة: إمتى تكمل وإمتى تمشي.
بالإضافة إلى: اختبارات وتمارين عملية تساعد كل شخص يقيم علاقته بصدق أوراق حوارية بين الشريكين لفتح المسكوت عنه نصائح لإدارة النقاشات بوعي بدل الصراعات
“قبل المأذون” هو كتابك لو كنت مقبل على الزواج، أو على الطلاق، أو حتى بتسأل نفسك: هل أنا في العلاقة الصح؟ وهل أنا جاهز أبدأ علاقة؟
